अश्विन शुद्ध १० ! विजयादशमी !
आज अश्विन शुद्ध १० ! विजयादशमी ! आपण सर्वांना या आपल्या संस्कृतीत महत्वाच्या मानल्या गेलेल्या साडेतीन मुहूर्तातील एक महत्वाच्या मुहूर्तासाठी मनापासून शुभेच्छा !
आपल्या सर्व हितकारक आणि शुद्ध बुद्धीच्या मनोकामना पूर्ण करण्यासाठी आजचा मुहूर्त खरोखरच चांगला आहे ! विजया दशमी आहे, आपण यशस्वी व्हाल ! तुम्हाला यशचं हवे आहे ना ? असत्याचा पराभव आणि सत्याचा विजय ! दुर्गुणांचा पराभव आणि सदगुणांचा विजय ! याच्या आठवणींचा आणि आठवणीसाठीचा हा दिवस ! म्हणूनच करायचे असते सत्कृत्य, म्हणूनच करायचे असते चांगले काम आणि म्हणूनच मागायचे असते सत्याचे बळ ! ---- कशासाठी यशासाठीच !
आज अंबामाता सीमोल्लंघनाला निघते, पराक्रम करायला निघते ! दुस्तानचे निर्दालन करायला निघते. शुभ आणि निशुंभाचा वध करून त्या अंबामातेने त्यांच्या, त्या दुष्ट शुंभ-निशुंभांच्या दहशतीच्या भीतीने जीवन जगात असलेल्या सर्वसामान्य भयभितांना भयमुक्त केले !
आजच्या दिवशीच प्रभू रामचंद्र यांनी रावणाचा वध केला आणि जगात निरंतर वाढणारे, सत्ताधुंध झालेले, दुर्वर्तनी एक पाप नष्ट केले ! ते रावण दहन आपण आजही साजरे करतो, प्रतीकात्मक रूपाने ! त्यापासून बोध घ्यायचा असेल तर हाच आणि एवढाच !
आपल्या दक्षिण भारतातील 'म्हैसूर' मधील दसरा हा फारच प्रसिद्ध ! विजयनगरचे चौदाव्या शतकातील साम्राज्य ज्यावेळी भरभराटीस होते त्यावेळचा दशहरा आपण आता अनुभवू शकणार नाही मात्र त्यावेळेपासूनची ही प्रथा आपण आजही पाळत आहोत. बरीच ठिकाणी आज भगवान बालाजीची पूजा करतात, दशहरा हा बालाजीच्या पूजेचा मानतात.
आम्ही मात्र लहानपणापासून देवाजवळ 'सरस्वतीचे' आपले पारंपरिक चित्र काढून आपल्याला ज्ञान मिळावे, म्हणून पूजा करतो ती आमच्या जवळील पुस्तकांची ! 'न हि ज्ञानेन सदृशं पवित्रमिह विद्यते । तत्स्वयं योगसंसिद्धः कालेनात्मनि विन्दति' हे भगवान श्रीकृष्णांनी आपण सर्वांना सांगितलेच आहे.
दिनांक ३० सप्टेंबर २०१७
No comments:
Post a Comment