’पवार नांवाचा करिष्मा आणि महिमा’ हा मा. शरद पवार यांच्यावर सुंदर लेख जेष्ठ पत्रकार व लेखक श्री. प्रवीण बर्दापूरकर यांनी लिहीलेला आहे. तो वाचला.

राजकारणी लोकांबद्दल एक वैशिष्ट्य असते, ते म्हणजे प्रतिस्पर्धी पक्ष वा सहकारी पक्ष, नोकरशाही, व्यापारी वर्ग, शेतकरी वर्ग आणि कोणतीही जात नसलेली ही सर्वसामान्य जनतेला यांचा येणारा अनुभव आणि त्यामुळे निर्माण झालेली, त्यांच्याबद्दलची प्रतिमा ही वेगळी असू शकते; परस्पर विरोधी असू शकते. त्यातून त्याने आपल्या राजकीय वर्चस्वासाठी दिलेली साद, आणि त्याला मिळणारा प्रतिसाद व प्रतिसाद देणारा गट, ही त्याची एकंदरीत प्रतिमा ठरवत असते. शक्य आहे, की काहींना यापेक्षा वेगळा व चांगला अनुभव आलेला असू शकतो.

हा अजून एक महत्वाचा मुद्दा, तो म्हणजे वाढत जाणारा जातीयवाद ! यांचा परिणाम एकमेकांविरूद्ध कडवट द्वेषात होत आहे, हे जाणवायला लागले आहे. सर्वसमावेशक राजकारणाच्या गप्पा करणाऱ्या राजकारण्यांच्या बोलण्यात आणि वर्तनात, परस्पर विरोध, आता अंधूक राहीलेला नसून, तो सूर्यप्रकाशाइतका स्पष्ट झाला आहे.

कदाचित असे पण म्हटले जावू शकते, की याला सर्व राजकीय पक्षांनी कमीजास्त प्रमाणात हातभार लावला असू शकतो. असे जरी असले, मात्र ज्यांची सत्ता आहे, त्यांची जबाबदारी ही नेहमीच जास्त असते. काही अपवाद सोडला, तर बहुसंख्यवेळा हा सत्तेत असलेला पक्ष व त्या पक्षाचा नेता आहे.

काहीही असले तरी, राजकीय पक्षाची अथवा त्याच्या नेत्यांची प्रतिमा ही त्यांची तत्वे, धोरण यांवर जशी असावयास हवी, हे अपेक्षित असते; त्यापेक्षा जास्त त्यांच्या प्रत्यक्ष वर्तनावर अवलंबून असते.

15.3.2019